Komek lêkolîner û xwendekarên Beşa Zimannasiyê ya Zanîngeha Bambergê roja 16ê Tîrmehê li Berlînê serdana Yekmalê kirin. Serdan bi rêberiya serokê beşa zimannasiyê ya zanîngehê Prof. Dr. Geoffrey Haig di çarçoveya semînara wan a bi navê “ Guherîna Ziman di Konteksta Kurdî de” pêk hat.
Di hevdîtinê de, ji Yekmalê Şerîf Derince, berpirsiyarê Akademiya Yekmalê, Hamsey Bayram berpirsiyara Kîta Pîya Kreuzbergê, hevkarên me Alan Dilpak û Lerzan Jandîl du pisporên zimanê Kurdî û Hekim Kilic, hev-berpirsiyarê Navenda Malbatan a Rengînê beşdar bûn.
Mêvanên me bi taybetî xwestin derbarê xebatên Yekmalê yên çend salên dirêj di qada ziman û perwerdehiyê de, pêşvebirina zimanê Kurdî li Berlînê, zehmetî û arîşeyên derdikevin pêş û çareserkirina wan, herweha plan û perspektîfên pêşerojê ji nêz ve hayîdar bin.
Di hevdîtinê de, mijarên wek guherînên di nav zaraveyên Kurdî de, nexasim Kurmancî, Kirmanckî, Soranî, û bikaranîna wan di nav xebatên pratîk ên Yekmalê de, zimanê zarokên Hêlînên Pîya û xebatên Akademiya Yekmalê di nav sazûmaniya Yekmalê de hatin nîqaşkirin.
Hevkarên me ji qad û xebatên xwe mînak dan û karê xwe pêşkêş kirin. Di encamê de danûstandineke dewlemend pêk hat. Em spasiya Prof. Haig û tîma wî dikin ji bo serdana wan a îlhambexş.
