لە چوارچێوەی پڕۆژەی “Empowerment kurdischer Kinder \ بەهێزکردنی منداڵانی کورد”دا، لقەکەمان لە شاری ماینتس دەست بە ئەنجامدانی دوو ڕاپرسی لەنێو دایکان و باوکان و منداڵەکانیان لە سەرانسەری هەرێمی ڕاینلاند پفالتس دەکات.
منداڵان وەک خوێندکاری فێرگەکانی ئەڵمانیا لە ڕاپرسیی یەکەمدا ئەزموون، بیر و تێڕوانینی خۆیان دەربارەی نەژادپەرستیی دژەکورد دەخەنەڕوو. هەروەها دایکان و باوکانیش لە ڕاپرسی دووەمدا هۆکار، گەشەکردن، ئەنجام و کاریگەرییەکانی بەلاوەنانی خوێندکارانی کورد لە فێرگە ئەڵمانییەکاندا هەڵدەسەنگێنن.
ڕاپرسیی یەکەم ڕاستەوخۆ لەگەڵ خوێندکارانی کوردی هەرێمی ڕاینلاند پفالتس-ە کە تیایدا یەکماڵ دەیەوێت لێکۆڵینەوە لەسەر ڕەفتارە نەژادپەرستییەکان هەم بەرانبەر منداڵانی فێرگە کە بەشداری ئەم ڕاپرسییە دەبن هەم بەرانبەر هاوپۆلەکانیان بکات – بە تایبەتیش ئەزموون و برینەدەروونییەکان بەهۆی هەڵوێستی نەژادپەرستی. هەروەها دەمانەوێت پێشنیازی چارەسەری لە ڕوانگەی منداڵانی فێرگەوە بدۆزینەوە.
ڕاپرسیی دووەم بۆ ئەو دایک و باوکە کوردانەیە کە منداڵەکانیان لە فێرگەکانی ئەڵمانیا لە هەرێمی ڕاینلاند پفالتس دەخوێنن. پرسیار ئاراستەی دایکان و باوکان دەکرێت دەربارەی ئەزموونی پەیوەندی لە نێوان منداڵانی فێرگە، پەیوەندی لە نێوان دایکان و باوکان و منداڵەکانیان هەروەها پەیوەندی لە نێوان دایکان و باوکان و کارمەندانی فێرگە.
ترس، ڕەخنە، هیوا و پێشنیازەکانی دایکان و باوکانی کورد بۆ چارەسەرکردنی ڕەفتارە نەژادپەرستییەکانی هاوپۆل و مامۆستایان هەروەها کارمەندانی فێرگە، دەبنە ئەنجامی گرنگی لێکۆڵینەوە زانستییەکەمان.
بۆ لقی ئێمە لە ماینتس گرنگە، نەژادپەرستیی دژەکورد کە نەک تەنها لەنێو گەورەساڵاندا بەڵکوو لەنێو منداڵ و جەوانانیشدا بەڕوونی دەبیندرێت، بخرێتە بەر چاوان، گفتوگۆی لەسەر بکرێت و چارەسەر بکرێت.
ئێمە جارێکی دیکە سپاسی aidFIVE gGmbH و “دۆیچە سۆسیال لۆتەری” دەکەین کە بە پشتگیریی دارایی دەرفەتی دەستپێکردنی ئەم پڕۆژەیان ڕەخساند. هەروەها سەرکەوتن بۆ هاوکارەکانمان لەم پڕۆژەیە دەخوازین و بە هیوای ئەنجامی بەسوودین.
لەپێناو بەرهەمداری و متمانەی زانستیی پڕۆژەکە، داوا لە هەموو دایکان و باوکان و منداڵەکانیان دەکەین بە شێوەیەکی کراوە، ڕوون و دروست وەڵامی پرسیارەکانی هەردوو ڕاپرسییەکەمان بدەنەوە. ڕاستگۆیی ئێوە دەنگی ئێمە و سەرکەوتنی هاوبەشمانە.
بۆ بەشداریکردن و زانیاریی زیاتر دەربارەی هەردوو ڕاپرسییەکە تکایە پەیوەندی لەگەڵ لقی یەکماڵ لە ماینتس بگرن:
Bürogemeinschaft
Walpodenstraße 10, 55116 Mainz
Büro: 06131 – 90 52 65
Mobil: 0163 – 521 9350
E-Mail: buro-mainz@yekmal.de
