ئەمساڵ لە چوارچێوەی پڕۆژەی “STAP vorwärts”دا لە ناوەندی خێزانیی بەرلین دەستمان بە شێوازێکی نوێ کرد.
ئامانجی دیداری مانگانەی دایکان و باوکان و منداڵەکانیان لە ناوەندی خێزانیی ڕەنگین ئەوەیە کە پلاتفۆڕمێکی دۆستانە بە لەبەرچاوگرتنی فرەزمانی و فرەکولتووری بۆ دایکان و باوکان و منداڵەکانیان بونیاد بنرێت. ئامانجی پلاتفۆڕمەکە ئەوەیە کە دایکان و باوکان لە بواری پەروەردە و پێشخستنی فرەزمانیی منداڵەکانیان کۆبکاتەوە. مەبەستی ئەوەیە دەرفەت بە یەکتر بدەن کە بیرۆکەکانیان ئاڵوگۆڕ بکەن، تۆڕبەندی ساز بکەن و بۆ پێشخستنی خۆیان لە یەکتر فێر ببن.
هەروەها خەمێکی سەرەکیش پێشخستنی ستراتیژی هاوبەشە بۆ زیادکردن و بەهێزکردنی ڕۆڵ و کاریگەریی دایکان و باوکانی کورد لە زارۆخانە و فێرگەکان.
کاتێک دایکان و باوکان لە ژینگەیەکی پێشوازی و پشتگیریدا مامەڵە دەکەن، منداڵان دەرفەتیان بۆ دەڕەخسێت پێکەوە یاری بکەن، ئافرێنەر بن و بە زمانی خێزانەکانیان قسە بکەن.
