ئەمساڵیش لەگەڵ منداڵان و خێزانەکانیان لە هەردوو زارۆخانەی پییا لە کرۆیتسبێرگ و ڤێدینگ لە ئاهەنگی هاوینەدا کۆبووینەوە.
زارۆخانەی پییا ڤێدینگ
لە ١١ی تەمووزدا زارۆخانەی پییا لە ناوچەی ڤێدینگ ئاهەنگی هاوینەی لە باخچە ڕەنگینەکەی ساز کرد. کەشوهەوا خۆش بوو، چەندین خێزان لەگەڵ منداڵەکانیان بانگهێشت کرابوون.
سەرنجڕاکێشترین بەشی ئاهەنگەکە گۆرانیی جووتەزمانیی منداڵان بوو. منداڵان بە جۆشوخرۆشەوە گۆرانی و دیلانی خۆیان پێشکەش کرد. بینینی ئەوان بەم شێوەیە کە زمانی جیاواز فێر بوون و دڵخۆشن، زۆر سەرنجڕاکێش بوو.
جگە لە نمایشەکانیان، لەو ئاهەنگەکەدا دەرفەت ڕەخسا کە منداڵان پێکەوە یاری بکەن. باخچەکەمان بووبوو بە بەهەشتێکی ڕەنگین کە منداڵان تیایدا بە دڵی خۆیان ڕاکەن و هاوڕێی نوێ بناسن.
هەستیارترین ساتی ئاهەنگەکە ماڵئاواییکردن بوو لەو منداڵانەی ئیدی دەپەڕنەوە فێرگە. ئەوان بە وشەی خۆشەویستی و دیاریی بچووک بۆ قۆناغە نوێیە بەڕێکران. ئەمە ساتێکی تایبەت بوو بۆ هەموو ئامادەبوان.
بووفە دەوڵەمەندەکەمان کە لە لایەن دایکان و باوکانەوە ئامادەکرابوو، خواردنی پێویستی پێشکەش کرد. لە خواردنی بەتامەوە بگرە تا دەگاتە شیرینی. هەمەچەشنیی خواردنەکان سەرنجڕاکێش بوو و هەر یەکەیان تاموچێژی جیاوازی هەبوو.
زارۆخانەی پییا کرۆیتسبێرگ
هەروەها زارۆخانەی پییا لە ناوچەی کرۆیتسبێرگ لە ١٢ی تەمووزدا ئاهەنگی هاوینەی ساز کرد و ماڵئاوایی لەو منداڵانە کرد کە ڕوو لە فێرگە دەکەن. جگە لە گۆرانکارییەکی چاوەڕواننەکراو لە کەشوهەوادا کە ناچاری کردین لە ماوەیەکی کورتدا ئاهەنگەکەمان بگوازینەوە نێو بینای زارۆخانە، ڕۆژێکی لەبیرنەکراو بوو بۆ هەموو ئامادەبوان.
سەرەتا وەها پلان دانرابوو کە ئاهەنگەکە لە باخچە بەڕێوە بچێت، بەڵام کاتێک دەستمان بە ڕازاندنەوە کرد، لەناکاو باران باری. بەڵام بە ڕێکخستنێکی بەپەلە، ئاهەنگەکە لەنێو زارۆخانەکەدا بەبێ کێشە بەردەوام بوو. منداڵان بە گۆڕانی هەوا نیگەران نەبوون و بە جۆشێکی مەزنەوە گۆرانی و دیلانی خۆیان پێشکەش کرد.
ماڵئاواییکردن لەو منداڵانەی ئیدی دەچنە فێرگە، بوو بە هەستیارترین ساتی ئاهەنگەکە. هەر منداڵێک بۆکسێکی پڕ لە دیاری وەرگرت. هەروەها منداڵان بە شێوەی سمبوولی بەنێو بازنەیەکدا بازیان دا و بە مەڕاسیمێک ماڵئاواییان لێ کرا. ئەمەش بووە هۆی شادیی منداڵان و دایکان و باوکانیان.
لە دوای نمایشەکانی منداڵان، هەموان تامی بووفەیەکی دەوڵەمەندیان کرد کە بە خواردنی دایکان و باوکان ڕازێندرابوویەوە. ئاهەنگەکە بە موزیک، دیلان و یاریی منداڵان تا کاتی عەسر بەردەوام بوو.
